做了13年娛樂版記者
80後阿風，做了13年娛樂版記者。兩年前，傳媒湧現裁員潮，她由傳統媒體轉至重點落在網上的媒體，要重新學習及適應的東西突然一下子湧現。
工作模式突然轉變、極大的工作壓力令她「吃不消」，因而患上抑鬱症，要看醫生服藥以控制病情。
傳媒大環境轉變，公司對員工的要求自然愈來愈多，加重好多工作量，她指：「要求你百足咁多爪，如果攝記就除咗影相、拍片，仲要識剪片。」的而且確，這是傳媒人現正面對的工作生態。
「我當年做娛記就要在公司行輪更制，要留守在公司返通宵更，因為要跟娛樂即時新聞，有突發事要即刻做，捱更抵夜是常事。公司要求愈來愈多，至後期更加愈來愈難做。」她憶述。
工作壓力大導致抑鬱
2012年左右，阿風以為轉往另一家報館後，工作會比較輕鬆，怎知工作模式轉變令她完全適應不到，工作壓力不減反升。
她憶述：「每日返工個腦都好似一片空白，所有嘢都好似唔識做咁，個人又緊張又驚。」
面對工作壓力，加上一連串嘅生活問題，阿風身心終於都支持不住而患上抑鬱症，結果要食藥睇醫生，「當時淨係想收埋自己，唔想面對任何嘢。」
在身心俱疲的情況下，她選擇裸辭，正式向過了十三年的記者生涯說再見。
她當時曾有轉行念頭，但她發覺「原來做記者係出唔返去打工，因為做記者太自由、主導性太高，好彩屋企無俾壓力我同埋都俾咗好多支持我，俾我慢慢建立返信心。」
她持續覆診食藥有兩至三年時間，病情慢慢有好轉。
裸辭後創業做日本代購
阿風喜歡日本，最初其實只是間中去日本散心Shopping，「去到日本見到好多家品、精品都好靚，自己好鍾意。」
沒想過在機緣巧合下，認識到一群同樣喜歡購買家品的年輕太太，發現日本代購應該「有得做」！她由代購貴價廚具開始，慢慢儲到一群客源。
2年前，阿風以1萬元成本，由代購網店開始做起，在社交網站開設 Bluebluebluek生活百貨-零售批發 專頁，「開網店成本其實好低，因為是代購形式，收Order後幫客人到日本代購家品。所以最基本的是要付出有一張機票的價錢及旅費就出發買貨。」結果不足一個月就回本，且開始有盈利。
阿風說：「我買下賣下，慢慢儲到一班客，啲客又對我幾好，所以就於一年前膽粗粗咁用喺觀塘的工廠大廈開鋪。」
她投資15萬開鋪，後來約滿後就搬到現時銅鑼灣店，主要因為可方便網店的交收。
主攻代購日本家品
「睇返轉頭，覺得人真係要搵一份自己鍾意嘅工作。可能記者都係自己鍾意嘅，但當時自己唔識處理壓力。以前老公會話我瞓覺會磨牙，應該係當時做嘢有壓力都唔知，而家搵到自己鍾意嘅買下嘢賣下嘢…老公話我少咗磨牙…」她說。
她更笑言：「買嘢可以減壓！可以抗抑鬱！」
事實上，日本時裝在香港也很受追棒，但為何夠風會選擇主攻日本代購家品呢？
「因為衫係有潮流，過季就會『宅貨』，所以才選擇代購日本家品，加上近年好多人都喜歡買有質素嘅家品，最重要係自己鍾意。」
而做生意讓她得到的喜悅也是無價的，「搵到一樣靚貨，個客又鍾意，會有一種滿足感！」
一腳踢做晒所有嘢
經營網店至現時開設了實體店的阿風，現時每個月飛往日本入貨一次，直言代購的經營環境有其難度，她說：「每次都飛一星期至12日，每次都自己一個人去，機票、住宿、交通至一日三餐都係成本。」
由搵貨源、傾價錢所有事都是她自己一個完成，「好多時都朝早六、七點起身，拖住個喼就開始做，做到凌晨一兩點仲喺街，自己抬貨、夜晚喺房包貨，再自己一個人推貨到郵局寄…係辛苦錢嚟嘅。」
遇到要代購日本限量產品時，就真的要守規矩的排隊購買，試過排了個半鐘才買到一個限量產品，所賺的錢稱得上「有血有汗」。
現時網上的代購店五花八門，想得到的都有「代購團」。
每月平均營業額超過20萬
說到經營上遇到的困難，阿風坦言：「當個個都做嘅時候，利潤就愈來愈低。人哋可能賺十蚊都會做，但我又有間鋪、又有個倉，經營成本高。」
要持續經營，就要比其他人更勤力找不同的「靚貨」、而且「要快」！「一定要勤力啲去搵貨先做得住，我都真係一日到黑都搵貨。」
因為市場需要，阿風的店除了代購日本家品外，代購產品種類也愈來愈多。
做日本代購 網店競爭大
現時每月平均營業額超過20萬，平均盈利接近9萬，以一個人計的公司來說，成績算得上非常「標青」！
不過，她指經營上也非「有賺無蝕」的，也不時遇上各類奇怪客人。
「網店競爭大，好多時都會遇到好多棄單嘅人，最大單嘅有幾千蚊棄單，都只能『硬食』！試過有個客不斷棄單、但又不斷開新帳戶來落單買嘢，前後總共用了三個不同嘅帳戶嚟落單買貨、再棄單！」她無奈地說。
同行未必如敵國
雖然代購網店競爭大，但她卻認為同行未必如敵國。
她說她在入貨時認識了一個日本人妻網店行家，大家雖是同行，但會一起入貨，「覺得大家都可以一齊賺錢，唔一定要鬥過你死我活。」
(轉載自 經濟一周)
